ڕۆژی سێشەممە بەڕێز هۆشەنگ محمد، بەڕێوه‌بەری گشتی ناوەندی هاوبەشی هەماهەنگی قەیرانەكان پێشوازی كرد لە بەڕێز كوردە عومەر، بەرێوبەری گشتی بەرەنگاربوونەوەی توندوتیژی دژی ئافرەتان بۆ گفتوگۆكردن دەربارەی ڕەوشی ئافرەتان و یارمەتیدانی ئاوارەكان لە هەرێمی كوردستان و بەهێزكردنی هەماهەنگی نێوان هەردوو لا.
مەبەست لە كۆبوونەوەكە بەهێزكردنی هەماهەنگی بوو له نێوان ناوەندی هاوبەشی هەماهەنگی قەیرانەكان و بەڕێوبەرایەتی گشتی بەرەنگاربوونەوەی توندوتیژی دژی ئافرەتان بە مەبەستی بەرەو پێشبردن و برەودان بە ڕەوشی ئافرەتان به تايبه‌تى ئاواره و په‌نابه‌ران لە هەرێمی كوردستان.
هه‌روه‌ها جێكردنه‌وه‌ى رۆڵ و پێكه‌ى ئافره‌تان له ره‌شنووى ياساى به‌ڕێوه‌بردن و وه‌ڵامدانه‌وه‌ى قه‌يران و كاره‌ساته‌كان له هه‌رێمى كوردستان كه ئێستا ناوه‌ندى هاوبه‌شى هه‌ماهه‌نگى قه‌يرانه‌كان له‌گه‌ڵ تيمێكى شاره‌زاى ناوخۆ و بيانى كارى له‌سه‌ر ده‌كات له چوارچێوه‌ى پلانى ستراتيجى كه له‌لايه‌ن ئه‌نجومه‌نى وه‌زيران په‌سندكراوه.
لە كۆبوونەوەكە هەردوولا هاوڕابوون لەسەر پێویستی دانانی پلان و ستراتیژییەكی ڕوون و واقیعی لەسەر بابەتی بابه‌تى جێندەر بۆ ئەوەی لەسەر ئاستی ناوخۆ و نێودەوڵەتی پشتگیری لێبكرێت بتوانرێت جێبەجێبكرێت.
بەڕێز هۆشەنگ محمد پشتگیری خۆی بۆ كارەكانی بەڕێوبەرایەتی بەرەنگاربوونەوەی توندوتیژی دژی ئافرەتان دەربڕی و ئامادەیی ناوەندی هاوبەشی هەماهەنگی قەیرانەكانی دەبڕی بۆ كاركردن لەگەڵ هەموو هاوبەشەكان بۆ دانان و جێبەجێكردنی پلانی ستراتیژیەكە.
