بەڕێز هۆشەنگ محمد، بەڕێوبەری گشتی ناوەندی هاوبەشی هەماهەنگی قەیرانەكان (JCC) پێشوازی كرد لە خاتوو هێیدی دیدریچ، بەڕێوبەری ڕێكخراوی ئەنجومەنی پەنابەرانی نەرویجی (NRC) بۆ گفتوگۆكردن لەسەر قەیرانی مرۆیی و قوناغی دوای داعش.
دواى به‌خێرهێنان، بەڕێز هۆشەنگ سوپاس و پێزانینی خۆی ده‌ربڕى بۆ هاوكارییە بەردەوامەكانی NRC بۆ ئاوارە و پەنابەران و كۆمەڵگای خانەخوێ لە هەرێمی كوردستان. هەروەها تیشكی خستە سەر گرنگی بەردەوامی و پابەندبوونی درێژخایەنی NRC و كۆمەڵگای نێودەوڵەتی بۆ یارمەتیدانی حكومەتی هەرێمی كوردستان و یەكە ئیدارییە ناوخۆییەكان بۆ ڕووبەڕووبوونەوەی قەیرانێكی تێكەڵ و ئاڵۆز لەنێو قەیرانێكی گەورەتر لە هەرێمی كوردستان و عێراق، بەتایبەتیش گەڕانەوەی ئاوارەكان.
خاتوو هێیدی سوپاسی پشتگیری و هاوكاری JCC كرد بۆ NRC و ڕایگەیاند كە ڕێكخراوەكەیان پابەندە و بۆ ماویەكی درێژخایەن دەمێنێتەوە بۆ هاوكاریكردنی ئاوارەكان و كەسانی پێویست لە كۆمەڵگای خانەخوێ و ناوچە ئازادكراوەكان. هەروەها گووتی كە NRC بەردەوام لە هەوڵدادەبێت بۆ كۆكردنەوەی پشتیوانی نێودەوڵەتی زیاتر بۆ ئاوارەكان و یارمەتیدانیان، بەتایبەت بۆ پرۆسەی دووبارە ئاوەدانكردنەوە و سەقامگیری لە دوای داعش و گەڕانەوەی ئاوارەكان بۆ ماڵەكانیان.
لە كۆبوونەوەكەدا هەردوولا هاوڕابوون لەسەر گرنگی هەبوونی پلانێكی گشتگیری درێژخایەن لە پرۆسەیەكدا كە هەموو لایەك تێیدا بەشداربن بۆ گێڕانەوەی ئاشتی و پێكەوە ژیانی كۆمەڵایەتی و سەقامگیرییەكی درێژخایەن بۆ هەموو پێكهاته‌كان. هەروەها هه‌ردوولا هاوڕابوون له‌سه‌ر بەردەوامی دان بەم جۆرە گفتگوگۆیانە بۆ بەهێزتركردنی ئەو هەماهەنگییە لە نێوان JCC و NRC هەیە.
